Saunala ja saunomisella oon selvä paikka

paikalisessa kylttyyrissä ja kylttyyriperintheessä. 

Moni sannoo vielä ette sauna

oon yks tärkeimistä paikoista kotona. 

Saunala sanothaan olevan monta tärkeätä merkitystä ja se toimii kans

paikkana rentoutumiselle, levole ja sosiaaliselle yhessäolole.

Saunomisella oon kauon aikaa sanottu olevan hyviä terhveyenvaikutuksia. 

Säänölinen peso vähentää riskiä tauthiin ja tartunthaan

ja sen lisäksi saunominen vähentää riskiä saa syän- ja suonitautia. 

Viimiaikoina oon kans julkastu tutkintotuloksia mikkä tukeva tätä.

Histuurisesti saunaa käytethiin muihinki aktiviteethiin mikkä vaait enämpi puhthautta. 

Se oli tavalista ette saunaa käytethiin siukkatupana, lapsensynnytyksessä

ja elläinten lahtaamisessa eli ruuhmiin säilytyksele oottaessa hautajaisia.

Monta erityyppistä saunaa löytyy ja kaikila oon eri etuja. 

Tornionväylän alueela sausauna ja se tavalinen sauna (märkäsauna) oon olhee tavalisimat. 

Sausauna lämmitethään ilman saurööriä ja pellit kiini. 

Huone täytyy saula ja valkea lämmittää kiviläjän.

Juuri ennen saunomista valkea sammutethaan ja sau päästethään ulos. 

Saunanlämpö nousee ko vettä viskathaan kuuhmaan kiviläihään.

Märkäsaunassa lämmitethään saunankiuas joko puila eli sähölä. 

Märkäsaunassa useasti seinät ja lavat kastelhaan. 

Lämpö rekleeraathaan saunankiukhaan kuumuuella

ja höyrylä mikä tullee ko vettä viskathaan kiukhaasheen. 

Saunomisella sanothaan kans olevan monta tärkeätä sosiaalia toimintaa. 

Moni sannoo ette sauna oon rauhotettu paikka missä ihmiset kohtaava samala tasola. 

Riiat laskethaan pois  ja sosiaalit erot ei ole yhtä näkösät

ko vaatheet ja muut lisät jätethään ulkopuolele saunaa. 

Saunominen saattaa tällä laila antaa rehelisiä ja enämpi  henkilökohtasia suhtheita

mikkä kans lissäävä sosiaalista yhessäoloa kylissä ja paikkakunnissa.